Stefna Íslandsbanka um sölu eigna

Íslandsbanki hefur sett sér stefnu um sölu eigna bankans. Markmið stefnunnar er að stuðla að gagnsæi, hlutlægni, jafnræði og hagkvæmni við ákvarðanatöku bankans um sölu eigna og efla þannig traust fjárfesta og viðskiptavina til bankans og sýna ráðvendni gagnvart hagsmunaaðilum.

1. Gildissvið og markmið

Stefna þessi skal gilda um sölu eigna bankans, þar á meðal fullnustueigna. Stjórn bankans skal stuðla að því að sambærilegri stefnu um sölu eigna sé fylgt í dótturfélögum bankans þar sem það á við. Stefnan á ekki við þegar um er að ræða sölu eignar til félags innan samstæðu bankans, enda sé tryggt að ákvæði stefnunnar eigi við í kjölfar slíkrar sölu. Markmið stefnunnar er að stuðla að gagnsæi, hlutlægni, jafnræði og hagkvæmni í ákvarðanatöku bankans um sölu eigna og efla þannig traust fjárfesta og annarra hagaðila til bankans. Stefnunni er jafnframt ætlað að takmarka rekstrar-og orðsporsáhættu fyrir bankann sem kann að felast í sölu eigna og hámarka endurheimtur krafna við sölu fullnustueigna. Sala eigna skal fara fram á viðskiptalegum forsendum að teknu tilliti til viðskiptalegra markmiða bankans og markaðsaðstæðna. Öll sala skal vera í samræmi við eðlilega og heilbrigða viðskiptahætti og venjur á fjármálamarkaði og gætt að samkeppnissjónarmiðum.

2. Meðferð sölu

Tilhögun sölumeðferðar skal liggja fyrir við ákvörðun um sölu eigna og vera í samræmi við stefnu þessa.

2.1 Opið söluferli

Eignir bankans skulu að meginstefnu seldar í opnu söluferli, þ.e. ferli þar sem bankinn veitir upplýsingar um að tiltekin eign sé til sölu og gefur þannig hugsanlegum kaupendum, sem uppfylla tiltekin skilyrði, kost á að gera kauptilboð í viðkomandi eign á jafnræðisgrundvelli í samræmi við nánar tilgreindar forsendur. Fjármálagerningar sem teknir hafa verið til viðskipta á skipulegum verðbréfamarkaði skulu seldir á markaði og telst slík sala hafa farið fram í opnu söluferli í skilningi stefnu þessarar.

2.2 Undantekningar frá opnu söluferli

Í undantekningartilvikum kunna hagsmunir bankans að kalla á lokað útboð eða annars konar fyrirkomulag á sölu eigna. Slíkt getur helgast af því að opið söluferli þjóni ekki hagsmunum bankans, viðskiptalegar eða samningsbundnar takmarkanir komi í veg fyrir að slíkt ferli verði viðhaft eða önnur lögmæt sjónarmið mæli gegn því að hafa opið söluferli. Slíkar takmarkanir kunna að vera t.d. ákvæði hluthafasamkomulaga eða samþykkta um forkaupsrétt, sjónarmið annarra eigenda, kröfuhafa eða eigenda viðskiptaleyfa eða áætlað söluverðmæti viðkomandi eignar telst ekki réttlæta kostnað við opið söluferli eða vegna annarra augljósra hagsmuna bankans. Stjórn tekur ákvörðun um frávik frá meginreglunni um opið söluferli í þeim tilvikum sem lýst er í kafla 2.3 hér á eftir. Í öðrum tilvikum veitir stjórn fjárfestinganefnd almenna heimild til þess að samþykkja frávik frá opnu söluferli m.t.t. framangreindra sjónarmiða. Frávik skulu sérstaklega rökstudd og skráð.

2.3. Sala eigna háð samþykki stjórnar

Sala eigna sem eitt af eftirfarandi skilyrðum á við um skal alltaf vera háð samþykki stjórnar bankans, að fenginni tillögu fjárfestinganefndar eða framkvæmdastjórnar, eftir því sem við á, og að undangengnu skriflegu mati á orðsporsáhættu og hagsmunaárekstrum:

Eignarhlutir í félagi í hliðarstarfsemi innan samstæðu bankans, sbr. 21. gr. laga um fjármálafyrirtæki nr. 161/2002.
Eignarhlutur í tímabundinni starfsemi þar sem virði eignar er yfir 1.000.000.000. Þegar eignarhluturinn er í félagi sem er skráð á skipulegan verðbréfamarkað skal miða við markaðsvirði frekar en bókfært virði hlutarins.
Fasteignir eða eignarhlutir í félögum utan um höfuðstöðvar bankans.
Fjármálagerningar, þar sem bókfært virði eignar eða verðmat er hærra en kr. 1.000.000.000, t.d. hlutdeildarskírteini í verðbréfa-, fjárfestingar- og fagfjárfestasjóðum, og aðrar fjárfestingar í fjármálagerningum.
Eign þar sem sala er talin fela í sér mikla orðsporsáhættu eða aukna hættu á hagsmunaárekstrum að mati fjárfestinganefndar.

3. Fullnustueignir

Fullnustueignir eru eignir sem bankinn leysir til sín til að tryggja fullnustu krafna. Slík fullnusta er eðlilegur þáttur í starfsemi viðskiptabanka. Sala fullnustueigna er í samræmi 22. gr. laga um fjármálafyrirtæki nr. 161/2002 og tekur mið af þeim sjónarmiðum sem Samkeppniseftirlitið beinir til fjármálafyrirtækja vegna yfirtöku á fyrirtækjum í samkeppnisrekstri. Stefnt skal að því að selja fullnustueignir eins fljótt og unnt er að teknu tilliti til markaðsaðstæðna. Fjárfestinganefnd fer með sölu fullnustueigna.

4. Verklagsreglur

Stjórnendur skulu gera viðeigandi verklag innan síns ábyrgðarsviðs til þess að endurspegla kröfur stefnunnar. Verklagsreglurnar skulu samþykktar af fjárfestinganefnd. Verklagsreglurnar skulu m.a. kveða á um söluferli einstaka eignaflokka, gagnsæi og tilhögun upplýsingagjafar í tengslum við sölu, ráðstafanir til að koma í veg fyrir hagsmunaárekstra og stýringu orðsporsáhættu í tengslum við söluferli.