Íslenskur efnahagur hefur verið á hröðum batavegi eftir stutt en snarpt samdráttarskeið í kjölfar faraldursins. Á síðasta ári var hagvöxtur 7,2% og hefur vöxturinn ekki verið hraðari frá árinu 2007. Greining Íslandsbanka spáir því að hagvöxtur verði 2,2% á þessu ári, sem er talsvert hægari vöxtur en í síðustu spá. Munar þar mestu um minni vöxt einkaneyslu og fjárfestingar. Útflutningsvöxtur vegur hvað þyngst í hagvextinum í ár en hlutur innlendrar eftirspurnar í vextinum verður umtalsvert minni en síðustu tvö ár. Á næsta ári hljóðar er spáð 2,6% hagvexti og 3,0% vexti árið 2025.
Útlit er fyrir talsverðan bata í utanríkisviðskiptum eftir umtalsverðan viðskiptahalla síðustu ár. Hraður útflutningsvöxtur og hægari vöxtur eftirspurnar spila þar stórt hlutverk. Hagfelldari utanríkisviðskipti ásamt öðrum þáttum renna stoðum undir gengi krónu. Í spánni er gert ráð fyrir að krónan verði um það bil 5% sterkari í lok spátímans en hún var í ágúst 2023.
Verðbólga hefur reynst þrálát en lætur undan síga á spátímanum, sér í lagi vegna rólegri íbúðamarkaðar og stöðugra verðlags erlendis. Það dregur hægt og sígandi úr spennu á vinnumarkaði og horfur eru að kaupmáttur launa vaxi á ný strax á þessu ári. Þrálát verðbólga kallar á talsvert aðhald Seðlabankans og útlit er fyrir að stýrivextir muni ná hámarki í 9,5% fyrir lok ársins. Hægfara vaxtalækkunarferli gæti hafist á vordögum 2024 að því gefnu að verðbólga þróist í takti við spá okkar.
