Eftir kraftmikinn hagvaxtarkipp árin 2021-2022 varð viðsnúningur í vaxtartaktinum á síðasta ári og fór hagvöxtur frá því að vera 8,9% á 1. fjórðungi ársins niður í 0,6% á 4. fjórðungi. Greining Íslandsbanka spáir því að hagvöxtur verði lítill á þessu ári en glæðist svo á ný á næstu árum. Við spáum því að hagvöxtur mælist 0,9% á þessu ári. Það er býsna hægur vöxtur í sögulegu tilliti og árið markar í raun hagsveifluskil þótt líklega verði ekki samdráttur á ársgrundvelli.
Á næsta ári teljum við að hagvöxtur verði 2,3%. Hraðari vöxtur neyslu og fjárfestingar ræður mestu um aukinn hagvöxt milli ára auk þess sem vöruútflutningur sækir í sig veðrið á ný. Á árinu 2026 er útlit fyrir 2,6% hagvöxt og vegur vaxandi innlend eftirspurn þyngra en hægari útflutningsvöxtur það ár.
Eftir talsverðan bata á utanríkisviðskiptum í fyrra er útlit fyrir að hóflegur viðskiptaafgangur verði allt spátímabilið. Þó er útlit fyrir talsvert minni útflutningsvöxt í ár en áður var spáð, bæði vegna hægari fjölgunar ferðamanna en vænst var og loðnubrests. Hagfelld utanríkisviðskipti ásamt öðrum þáttum styðja við hóflega styrkingu krónu og er gert ráð fyrir að krónan verði 5% sterkari þegar kemur fram á árið 2026 en hún var í byrjun þessa árs.
Verðbólga hefur hjaðnað talsvert eftir verðbólguskot síðustu ára. Allnokkur þróttur er þó enn bæði í vinnumarkaði og íbúðamarkaði þótt fremur hófsamir kjarasamningar á stórum hluta almenns vinnumarkaðar hafi dregið úr óvissu um launaþróun næstu árin. Horfur eru á að atvinnuleysi aukist lítillega en kaupmáttur launa vaxi nokkuð á spátímanum. Þá mun íbúðaverð væntanlega hækka nokkuð að raunverið næstu misserin. Verðbólgan mun líklega mælast tæplega 6% að jafnaði á þessu ári en hjaðna niður undir 3% á spátímanum.
Þrálát verðbólga kallar á áframhaldandi aðhald Seðlabankans en þó eru líkur á því að hægfara vaxtalækkunarferli hefjist á seinni helmingi þessa árs. Mun því trúlega ljúka með stýrivexti nærri 5,5%, sem við teljum líklega nærri jafnvægisvöxtum um þessar mundir.
