Íslenskur efnahagur hefur rétt myndarlega úr kútnum eftir skarpt samdráttarskeið í kjölfar faraldursins. Útlit er fyrir að hagvöxtur á síðasta ári hafi verið 7,0% þar sem mikill kraftur var í eftirspurnarvexti og ferðaþjónustan náði vopnum sínum á ný. Hagvaxtarhorfur í ár hafa batnað frá síðustu spá og spáð er 3,4% hagvexti í ár. Útflutningur er áfram í lykilhlutverki auk þess sem áfram verður talsverður þróttur í eftirspurninni. Á næsta ári er einnig spáð 3,4% hagvexti þar sem hlutur einkaneyslu og fjárfestingar eykst á ný en dregur úr útflutningsvextinum. Á síðasta ári spátímans, 2025, er spáð tæplega 3% hagvexti og ræður hægari útflutningsvöxtur mestu um hægari hagvöxt.
Viðskiptahalli var umtalsverður á síðasta ári og útlit er fyrir nokkurn halla á yfirstandandi ári. Í kjölfarið gerum við ráð fyrir jafnvægi á utanríkisviðskiptum. Hagfelldari utanríkisviðskipti ásamt fleiri þáttum auka líkur á styrkingu krónu þegar frá líður. Í spánni er gert ráð fyrir að krónan verði um það bil 8% sterkari í lok spátímans en hún var í árslok 2022 sem jafngildir því að evran kosti u.þ.b. 142 kr. undir árslok 2025.
Verðbólga er í hámarki og lætur undan síga á spátímanum, sér í lagi vegna rólegri íbúðamarkaðar. Það dregur hægt og sígandi úr spennu á vinnumarkaði og horfur eru á að kaupmáttur launa taki að vaxa á ný strax á þessu ári eftir að hafa staðið í stað árið 2022. Þrálát verðbólga kallar á talsvert aðhald Seðlabankans og útlit er fyrir að stýrivextir hækki um 0,5% á fyrsta fjórðungi ársins og vaxtahækkunarferli bankans ljúki með 6,5% stýrivöxtum.
