Eftir kraftmikinn hagvaxtarkipp árin 2021-2022 dró umtalsvert úr vextinum eftir því sem lengra leið á árið 2023. Má segja að hagkerfið hafi jafnt og þétt snúist frá þenslu til aðlögunar. Sú þróun einkenndi einnig fyrstu þrjá fjórðunga síðasta árs enda mældist samdráttur í vergri landsframleiðslu (VLF) 1% að jafnaði á tímabilinu. Greining Íslandsbanka áætlar að VLF hafi skroppið saman um 0,5% að raungildi árið 2024.
Á þessu ári teljum við að hagvöxtur mælist 2,2%. Vaxandi neysla, sér í lagi einkaneysla, á drýgstan þátt í þeim vexti. Þar koma til örari kaupmáttarvöxtur, áframhaldandi fólksfjölgun og ráðstöfun á hluta af uppsöfnuðum sparnaði. Síðari tvö ár spátímans er útlit fyrir heldur hraðari hagvöxt eða um 2,5% árið 2026 og 2,6% árið 2027.
Eftir viðskiptaafgang ársins 2023 sló nokkuð í bakseglin á viðskiptajöfnuði á síðasta ári. Útlit er fyrir að viðskiptahalli á síðasta ári hafi alls numið tæplega 70 ma.kr. sem samsvarar um það bil 1,5% af VLF ársins. Við teljum horfur á heldur hagfelldari þróun á spátímanum þó trúlega verði lítilsháttar viðskiptahalli í ár, eða sem nemur 0,3% af VLF ársins. Á næsta ári eru horfur á að viðskiptajöfnuður verði rétt við núllið og á árinu 2027 gæti viðskiptaafgangur numið 0,5% af VLF. Við gerum einnig ráð fyrir lítilsháttar styrkingu krónu á fyrri hluta spátímans. Eftir því sem líður á aukast hins vegar líkurnar á einhverri veikingu krónu ef fram heldur sem horfir að verðlag hérlendis hækki hraðar en í nágrannalöndum.
Verðbólga hefur hjaðnað talsvert frá því hún náði hápunkti á fyrri hluta árs 2023. Atvinnuleysi hefur þó ekki aukist verulega og vinnumarkaður er enn nálægt því sem kalla mætti fulla atvinnu. Langtímakjarasamningar við stærstan hluta vinnumarkaðar hafa þó eytt töluverðri óvissu varðandi framhaldið. Horfur eru á að íbúðamarkaður gefi aðeins eftir á spátímanum þó hóflegar raunverðshækkanir séu í kortunum að okkar mati. Verðbólga í viðskiptalöndum okkar hefur hjaðnað og náð markmiði víða en nokkur óvissa varðandi framhaldið er enn til staðar. Við gerum ráð fyrir að verðbólga verði að jafnaði 3,6% á þessu ári, 3,0% árið 2026 og 3,2% árið 2027.
Vaxtalækkunarferli er loksins hafið eftir alllangt hávaxtatímabil. Við gerum ráð fyrir að vaxtalækkunarferli haldi áfram fram á mitt ár 2026. Stýrivextir verða 6,5% í árslok 2025 og á bilinu 5,0% - 5,5% á seinni hluta spátímans að okkar mati.
