Íslandsbanki mun þann 1. júní breyta vöxtum í framhaldi af vaxtaákvörðun Seðlabanka Íslands í síðustu viku. Útlánavextir munu hækka um 0,20% - 0,25% og innlánavextir um allt að 0,25%.
Samhliða mikilli lækkun vaxta Seðlabankans á síðasta ári lækkuðu vextir innlána bankans almennt töluvert minna. Því gengur bankinn skemur í hækkun vaxta tiltekinna reikninga að þessu sinni.
Fyrirtæki glíma mörg hver enn við afleiðingar COVID-faraldursins, sér í lagi í ferðaþjónustu. Rétt þykir því að stíga varlega til jarðar hvað hækkun almennra kjörvaxta fyrirtækja varðar. Bankinn gengur því ekki lengra í hækkun vaxta fyrirtækja að þessu sinni.
Vaxtabreytingarnar eru eftirfarandi:
- Vextir helstu sparnaðarreikninga hækka um 0,10-0,25%
- Óverðtryggðir kjörvextir hækka um 0,20%
- Yfirdráttarvextir einstaklinga og fyrirtækja hækka um 0,25%
- Breytilegir óverðtryggðir kjörvextir Ergo og vextir bílalána og bílasamninga hækka um 0,25%
- Breytilegir vextir óverðtryggðra húsnæðislána hækka um 0,25%
- Fastir vextir óverðtryggðra húsnæðislána til 3 ára hækka um 0,20%
- Fastir vextir óverðtryggðra húsnæðislána til 5 ára hækka um 0,55%
Eins og áður segir taka breytingarnar gildi 1. júní eða skv. tilkynningu í vaxtatöflu sem verður birt þann dag.